Цэны на новыя аўтамабілі ў Беларусі ў 2025 годзе будуць заставацца адносна стабільнымі пры ўмове ўмераных ваганняў курсаў валют. Такі прагноз агучыў дырэктар СЗАТ «БЕЛДЖЫ» Генадзь Свідэрскі ў інтэрв'ю парталу av.by. Паводле яго словаў, прадпрыемства мае ролю «стабілізатара» цэн на беларускім аўтамабільным рынку, аднак яго магчымасці ў стрымліванні росту цэн абмежаваныя.
На долю «БЕЛДЖЫ» прыпадае 51% продажаў аўтамабіляў за 11 месяцаў 2024 года, што робіць яго галоўным арыенцірам для іншых удзельнікаў рынку.
«Калі наш завод падымае цану, то і ўсе могуць перапісаць цэннікі ў бок павелічэння», — адзначыў Свідэрскі.
Для стрымлівання цэн прадпрыемства актыўна працуе над зніжэннем сабекошту і выдаткаў, каб утрымліваць даступныя прайсы. Аднак вялікая доля замежных камплектавальнікаў і залежнасць ад валютнага курсу ствараюць дадатковыя рызыкі.
«Наконт прагнозаў на 2025 год: калі валютныя курсы будуць вагацца ў рамках вядомага нам калідора (ад 3,43 да 3,53 беларускага рубля. — Заўв. рэд.), то я не бачу падставаў для істотнага ўзняцця цэн. Думаю, гэта малаімаверна», — падкрэсліў кіраўнік завода.
Аднак ён дадаў, што ва ўмовах эканамічных зменаў, назіраных як у Беларусі, так і ў Расіі, цэны на аўтамабілі могуць павялічвацца, калі валютныя курсы выйдуць за гэтыя рамкі. Пры гэтым кіраўнік «БЕЛДЖЫ» падкрэсліў, што прадпрыемства працягне адаптавацца да эканамічных выклікаў, каб мінімізаваць уплыў вонкавых фактараў на цану аўтамабіляў для беларускіх пакупнікоў.