Намесніца дзяржаўнага сакратара ЗША па палітычных пытаннях Вікторыя Нуланд ідзе ў адстаўку. Пра гэта гаворыцца ў заяве самога дзяржсакратара Энтані Блінкена, апублікаванай на сайце Дзярждэпартамента ЗША 5 сакавіка.
— Вікторыя Нуланд паведаміла мне, што плануе ў найбліжэйшыя тыдні пакінуць пасаду намесніцы дзяржсакратара па палітычных пытаннях, — паведаміў Блінкен.
Ён падзякаваў сваёй намесніцы за працу і адзначыў, што Нуланд прабыла «тры з паловай дзесяцігоддзі» на дзяржслужбе, у тым ліку ў Дзярждэпартаменце. Яна працавала за шасцю прэзідэнтамі і дзесяццю дзяржсакратарамі ЗША.
У прыватнасці, Блінкен падкрэсліў, што Нуланд актыўна падтрымлівала Украіну пасля расійскага ўварвання.
— Яе намаганні былі незаменныя для супрацьстаяння поўнамаштабнаму ўварванню Пуціна ва Украіну, фармавання глабальнай кааліцыі для забяспечання ягонай стратэгічнай паразы і аказання дапамогі Украіне ў дасягненні таго дня, калі яна зможа цвёрда стаць на ногі — дэмакратычна, эканамічна і ў вайсковых адносінах, — гаворыцца ў заяве.
Блінкен дадаў, што ён і прэзідэнт ЗША Джо Байдэн папрасілі намесніка дзяржсакратара па пытаннях кіравання Джона Баса часова выконваць абавязкі намесніка кіраўніка Дзярждэпа па палітычных пытаннях, пакуль не будзе знойдзеная замена Нуланд.