У сераду, 16 лістапада, падчас сустрэчы з супрацоўнікамі прадпрыемстваў у Бабруйску першы намеснік старшыні Камітэта дзяржаўнай бяспекі Сяргей Церабаў заявіў, што беларускім уладам нібыта вядомыя планы апазіцыі. Паводле яго словаў, у Аб’яднанага пераходнага кабінета «мэта тут адна: пазбаўленне легітымнасці дзейнай улады і апраўданне тэрактаў і дыверсій». Акрамя гэтага, ён дадаў, што «зімой збеглыя збіраюцца пачаць раскачку студэнцкага і выкладчыцкага асяроддзя», таксама яны будуць «качаць тэму» цэнаўтварэння і падаткаабкладання. «Люстэрка» задало Кабінету пытанні пра тое, ці ёсць у іх такія намеры.
— Якія ў Кабінета ў прынцыпе планы на зіму?
— Рыхтаваць план і размяркоўваць адказнасць на пераходны перыяд, нарошчваць сілавы патэнцыял для абароны незалежнасці Беларусі і акумуляваць міжнародную падтрымку для дасягнення нашых мэтаў.
— Ці ёсць у планах мэта «пазбаўлення легітымнасці дзейнай улады і апраўданне тэрактаў і дыверсій»?
— Мы не можам пазбавіць легітымнасці тое, што яе не мае. Таксама ў дзейнасць Кабінета не ўваходзіць апраўданне тэрактаў і дыверсій, мы рашуча асуджаем тэракты і дыверсіі, учыненыя прадстаўнікамі нелегітымнай улады за апошнія два гады, і рэкамендуем рыхтавацца адказваць за гэта ў судзе.
— Кабінет плануе раскачку пытанняў цэнаўтварэння і падаткаабкладання?
— Прадстаўнік так званага КДБ у сваім дакладзе фактычна папярэджвае пра тое, што будуць расці плата за адукацыю і падаткі, і асцерагаецца, што Кабінет збіраецца паказваць на гэтую праблему, якая з’яўляецца вынікам наплявальніцкай палітыкі рэжыму ў дачыненні да людзей. У гэтым ён мае рацыю.
У задачы Кабінета ўваходзіць каардынацыя распрацоўкі плана стабілізацыі эканомікі ў пераходны перыяд, і, на жаль, дзякуючы абсурдным законам рэжыму, гэтая задача робіцца для нас усё большым выклікам.
— А што наконт задач «па абсталяванні сховішчаў для інструментаў, будаўнічай
і іншай спецыяльнай тэхнікі, якая можа быць выкарыстаная ў масавых
беспарадках і дыверсійных мэтах»?
— Гэта сведчыць пра тое, што прадстаўнік нелегітымнай улады разумее, што незадаволенасць беларусаў сітуацыяй у краіне нарастае, і спрабуе апраўдацца перад начальствам за тое, што ўрэшце давядзецца сустрэцца з наступствамі адмовы Лукашэнкі перадаць уладу мірна ў 2020-м годзе. Аднак здагадкі так званага КДБ пра нібыта планаваныя дзеянні Кабінета далёкія ад рэальнасці.
